Lhienda de ls Scrinheiros

Diç la tradiçon que an Bilasseco (Bumioso), ua aldé adonde siempre se falou mui bien l mirandés.

Que an tiempos çcoincidos, bien alhá dantes, ls moradores quando bírun la lhuna chena ampeçórun a mirar par'eilha i cuidórun que era un queiso.

Puosto que fui l muito anteresse, ampeçórun a pensar qual era l melhor modo d'alhá chegar.

Cumo ls moradores de Bilasseco siempre fúrun antrejeitados a fazer scrinhos, que son cestos feitos de pencas (palhas) cun baras de silbas, muito ousados para guardar pan i farelos.

Cuidórun d'ancarrapitar scrinhos, ponendo uns anriba de ls outros,que tenien scrinhos pa l agarrar i apuis l quemer por todos.

S'assi pensórun melhor l fazírun.

Botórun-se al serbício, ponendo scrinhos uns anriba de ls outros i tamien un tiu, cumo se fai ua torre.

Quando staba acerca, l tiu que staba anriba de ls scrinhos, ampeçon a boziar pa ls que stában ne l chano que só faltaba un scrinho pa l agarrar.

Al quâ eilhes respundírun que nun tenien mais.

I ende se fizo ua baliente çcuçon para resolber l porblema.

 Siempre i todos ls que cúntan la lhienda dízen que fui l pai de l sou abó, que pensou i dixo:

-I se nós sacarmos l scrinho que stá ambaixo i l punirmos anriba yá alhá chegamos!

Todos reberenciórun tamanha anteligéncia.

Mas qual nun fui la sue zeiluson, puis assi que sacórun l scrinho que staba ambaixo, fui todo un zbarrulho de scrinhos, sien que ls moradores de Bilasseco quemíssen l queiso tan antolhado.

Esta ye la lhienda de Bilasseco, que por bias deilha inda hoije cháman Scrinheiros als moradores desta aldé

... E assim tenho raizes escrinheiras: Vilar Seco, uma Terra que pertencerá sempre ao meu coração!!